لژێر چئاڤدێرى و ئاماده‌بوونا وه‌زیرێ خواندنا بلند دكتۆر (ئارام محمد قادر) و ب ئاماده‌بوونا دكتۆر چارلس كلارك وه‌زیرێ به‌ریا نها یێ په‌روه‌رده یا برێتانییا و ئه‌ندامێ بلند یێ بۆردێ ئه‌میندارێ زانكۆیا كامبرێج و هه‌ژماره‌كا سه‌رۆكێن زانكۆیێن هه‌رێمى ل ڕۆژا سێشه‌مبێ ڕێكه‌ڤتى 23/11/2021 وه‌زاره‌تا خواندنا بلند رێككه‌فتننامه‌یه‌ك سه‌باره‌ت په‌ره‌پێدانا سه‌نته‌رێن زمانێ ئنگلیزى لگه‌ل زانكۆیا كامبرێج یا برێتانى ئیمزاكر.
د ئه‌ڤێ مه‌راسیمێدا هه‌ر ئێك ژ سه‌رۆكێ زانكۆیا زاخۆ (پ.د. ناظم سلیمان عبدالعزیز) و رێڤه‌به‌رێ سه‌نته‌رێ زمانى ل زانكۆیا زاخۆ (م. ئیڤان مراد حسن) وه‌ك نوینه‌رێن زانكۆیا زاخۆ پشكدار بوون. ئه‌ڤ مه‌راسیمه ب شێوه‌یه‌كێ ئۆنلاین د ناڤبه‌را هه‌ردوو لایه‌ناندا وه‌زاره‌تا خواندنا بلند و ڤه‌كۆلینێن زانستى و و زانكۆیا كامبرێج برێڤه‌چوو.
لده‌ستپێكا ئه‌ڤێ مه‌راسیمێ وه‌زاره‌تا خواندنا بلند گرنگیدان و په‌ره‌پێدانا خۆ بۆ سه‌نته‌رێن زمانان دیاركر و دا دیاركرن كو ئه‌ڤ رێككه‌ڤتننامه‌یه ده‌ستپێكا كارێ هه‌ڤبه‌شه بۆ په‌ره‌پێدانا زێده‌تر بۆ سه‌نته‌رێن زمانێ ئنگلیزى ل زانكۆیێن كوردستانێ و بلندكرنا كوالێتى یا خواندنێ و بزاڤكرن بۆ ناساندنا باوه‌رنامه‌یێن وان لسه‌ر ئاستێ نیڤده‌وله‌تى.
د به‌شه‌كێ دى دێ گۆتارا وه‌زاره‌تێدا سه‌باره‌ت ب رێككه‌ڤتننامه‌یێ كو بریتیه ژ هه‌لسه‌نگاندنا سه‌نته‌رێن زمانێ ئنگلیزیێ ژلایێ زانكۆیا كامبرێج ڤه و راهێنانێن ستافێ زانستى یێ سه‌نته‌رێن زمانێ ئنگلیزیێ ژلایێ تیمه‌كا پسپۆر و شاره‌زا یێن زانكۆیا كامبرێج ڤه و هه‌لسه‌نگاندنا شێوازێ ئه‌زموونێن به‌شداربووێن خۆلێن سه‌نته‌رێ زمانى.
ل لایه‌كێ دى دكتۆر چارلس كلاركى ژى گۆتارا زانكۆیا كامبرێج دا ڤه‌خواند و گرنگی و پێنگاڤێن ئه‌ڤێ رێككه‌ڤتننامه‌یێ دانه دیاركرن و په‌یوه‌ندیێن زانستى دناڤبه‌را وه‌زاره‌تا خواندنا بلند و زانكۆیا كامبرێج دانه دیاركرن. ل دوماهیكێ هاته خواستن كو كارێن هاوبه‌ش بهێنه كرن د ناڤبه‌را هه‌ردوولایان دا ژبۆ پتر خزمه‌تكرن بۆ سه‌نته‌رێن زمانێ ئنگلیزیێ و دروستكرنا په‌یوه‌ندیێن درێژ لگه‌ل حكومه‌تا هه‌رێما كوردستانێ.
ل دوماهیكا ئه‌ڤێ مه‌راسیمێ رێككه‌ڤتننامه ژ لایێ هه‌ر ئێك ژ دكتۆر محمد حسێن سه‌رۆكێ ده‌زگه‌هێ سه‌رپه‌رشتییا دلنیا جۆرى و متمانه‌به‌خش ل وه‌زاره‌تا خواندنا بلند و ڤه‌كۆلینێن زانستى و دكتۆر چارلس كلارك ژ زانكۆیا كامبرێج هاته ئیمزاكرن
